Gikabalak-an sa International Atomic Energy Agency (IAEA) ang pagbanhaw pag-usab sa nuclear facility sa Iran.
Kini human nga wala pa gihapon tugoti ang mga personahe sa IAEA nga mopahigayon og inspeksyon aron maseguro nga walay gitukod nga uranium enrichment plant sa siyudad sa Isfahan.
Wala usab matud pa masayod ang ahensya kung asa ang eksaktong nahimutangan sa nuclear plant sa maong nasud.
Sukad nga miulbo ang bag-ong gubat sa Iran, gidid-an na nila ang mga inspektor sa IAEA nga makasulod sa mga nuclear sites. Nakalatid sa 2015 nuclear deal nga misugot ang Iran nga limitahan na lang sa 300 ka kilo ang ilang stockpile sa uranium.
Sa wala pa gipahigayon sa US ang mga pag-atake niadtong Hunyo 2025, miabot na sa 441 ka kilo ang enriched uranium sa Iran, diin hapit na kini moabot sa 60 porsyento nga gikinahanglan sa paghimo og nuclear weapon.
Tungod niini, nagtuo ang IAEA nga gitago pa gihapon sa Iran ang ilang mga nuclear facility. Mahinumdoman nga mitanyag na usab ang US og $50-milyon nga ganti alang niadtong makatudlo kon asa nahimutang ang mga nuclear facility sa Iran. (raniel mahunyag)
