CAGAYAN DE ORO CITY – Napatay sa hiniusang operasyon sa militar ug kapolisan ang gi-konsiderar nga ‘amir’ sa teroristang ISIS sa South East Asia nga si Faharudin Hadji Benito Satar alyas Abu Zacaria sa Brgy Bangon,Marawi City, Lanao del Sur kaganihang kadlawon.
Miingon si AFP Western Mindanao Command spokesperson Army Maj. Andrew Linao nga dungan nga gilusob sa govt forces ang hideout ni Zacaria hinungdang natigayon ang sinukliay sa mga bala nga nag-resulta sa kamatayon niini.
Siya miingon nga pipila usab sa tropa sa gobierno ang samaron sa maong operasyon.
Ang grupo ni Zacaria ang kanhi usab na-engkuwentro sa state forces sa lungsod sa Marogong,Lanao del Sur diin napatyan sa 4 ka sakop niadtong unang semana sa Hunyo ning tuiga.
Hisayrang human napatay sa govt forces si Abu Sayyaf leader Isnilon Hapilon nga nagsilbing ISIS emir sa panahon sa Marawi Seige hinungdang gipulihan ni Owaida Marohombsar alyas Abu Dar.
Apan napatay usab kini sa govt forces sa Lanao del Norte sa Marso 2019 hinungdang si Zacaria ang mipuli sa iyang dapit.
