Usa ka dakong kadaugan alang sa mga lokal nga drayber ang hugot nga pagpatuman sa City Ordinance No. 10551 o ang 2007 Transport Ordinance nga nagdili sa mga probinsyal nga pampasaherong sakyanan nga makasulod sa sentro sa dakbayan sa Cagayan de Oro.
Sumala ni United Drivers Association (UNIDA) President Joel Gabatan, pabor kaayo sila niini tungod kay nahunong na ang dili patas nga sistema diin ang mga modernized jeep makalusot kaniadto hangtod sa Gaisano, samtang ang mga tradisyonal nga jeep gikan sa Alubijid, Gitagum, ug Initao kutob lamang sa Bulua Terminal.
Dugang pa niini, dugay na niyang gipadangat ang maong reklamo ngadto sa City Council hangtod nga giaksyonan na kini sa miaging semana.
Isip resulta, opisyal nang napatuman pag-usab ang usa ka bulan nga dry-run sa maong patakaran sugod niadtong Hulyo 28 aron hingpit nga mahapsay ang kadalanan ug maseguro nga walay malupigan nga mga ordinaryong drayber sa komunidad.
