Misaway si Vice President Sara Duterte sa suhestiyon sa Malacañang nga magtigom sa tubig sa mga balde isip pagpangandam sa posibleng super El Niño, ug miingon nga dili kini igo aron matabangan ang mga Pilipino sa posibleng krisis.
Kini maoy gipadayag sa bise presidente atol sa usa ka kalihokan sa Hong Kong, nga kinahanglan adunay mas komprehensibong plano ang gobyerno aron maatubang ang mga hagit nga dala sa hulaw.
Gipahimangno usab ni Duterte ang posibleng kakulang sa suplay sa pagkaon, ilabi na sa bugas, nga mahimong resulta sa grabeng epekto sa El Niño.
Gitumbok niya nga ang pagkunhod sa bili sa peso batok sa dolyar mahimo usab nga makaapekto sa importasyon sa mga batakang produkto ug makadugang sa kabug-at sa kahimtang sa ekonomiya.
