CAGAYAN DE ORO CITY, Philippines – Nagpakitabang na ang mga residente sa Zone 8, 6 ug mga residente kilid sa Merkado sa Barangay Cugman tungod sa walay aksiyon nga gibuhat sa ilang lokal nga kagamhanan sa pagkuha sa mga basura.
Segun ni Jigs Neri, usa sa mga reklamante, walay basurero ang gakuha sa ilang mga basura sulod sa merkado ug sa Kalye Pogi Street.
Gikondinar ni Neri ang pagpabungol-bungol sa konseho sa barangay.
Mihinaut ang reklamante nga madungog sa City Local Environment and Natural Resources ang ilang hangyo nga limpyohan na ang ilang dalan tungod sa epekto sa kabahu sa basura nga nagresulta sa paghinay sa ilang kinitaan ug pagsakit sa pipila ka namuyo sa palibot.
Sa pikas bahin, gitawag ni Brgy Cugman Former Kagawad Engr Elmer Cotiamco nga dakung bakakon si Neri.
Namugos si Cotiamco nga dugay nang nahusay ang problema sa basura partikular na sa lugar sa mga reklamante, apan sila mismo dili gatuman sa eskedyul sa pagkuha sa mga trak sa basura sa Tencil Construction Incorporated.
Mitin-aw si Cotiamco nga daan nang gisuginlan ang mga apektadong residente nga itapok ang ilang basura sa dalan kung asa muagi ang garbage truck, kay dili makasulod sa ilang zona tungod sa kapiot sa dalan.
