Gitubag ni Cagayan de Oro City Jail Female Dormitory Warden Jail Senior Inspector Mary Rose Pacana ang naggawas nga balita bahin sa giingong pag-abuso sa mga babayeng PDL sa ilang buhatan pinaagi sa pagpahibalo nga aduna lamang limitado nga pagpakigsagol ang mga babaye ug lalaking preso.
Gipasabot sa maong warden nga mahitabo lamang ang pagkita sa duha ka bahin sulod sa prisohan panahon sa mga opisyal nga kalihokan sama sa pagtuon sa TESDA ug ALS.
Dugang pa ni Pacana nga gitugotan usab ang pagkita kausa sa usa ka bulan alang lamang sa mga preso nga adunay kabanay o pamilya sa pikas nga dorm.
Gitin-aw usab sa maong opisyal nga gipatuman sa buhatan ang higpit nga seguridad diin gikinahanglan gyud ang pagtugot sa duha ka warden sa dili pa papagawason ang mga preso sa mga selda.
