CAGAYAN DE ORO CITY – Gisugyot sa kapolisan nga ipaubos sa otopsiya ang daw duol nang makalabera nga patay’ng lawas sa Hapon nga napalgan sulod sa pansayan sa gipuy-ang balay sa Zone 1,Eagle Street,Brgy Kauswagan ning syudad.
Giila ni Carmen Police Station commander Police Maj. Mario Mantala Jr ang biktima nga si Okada Shu Netsi,78 anyos,Japanese national ug dugay nang nagpuyo dinhi sa dakbayan.
Sa pasiunang imbestigasyon sa kapolisan, dunay mitaho nga mga residente ngadto sa mga opisyal sa brgy kabahin sa dili na maayong baho nga nalanghap nila sa palibot rason nga gilayong gihataga’g aksyon.
Giguba pa sa mga otoridad ang naka-kandado nga pultahan sa balay aron sudlon kini ug matultulan ang lokasyon sa biktima.
Nadiskobre sa kapolisan ug brgy officials nga state of decomposition na ang lawas sa nag-inusarang biktima sulod sa comfort room.
Nagkagidlay ang sulod sa balay apan walay ilhanan nga tinuyo nga gipatay ang biktima.
Kini ang rason nga gisugyot sa mga otoridad nga angay mapaubos sa otopsiya aron masuta kon namatay tungod sa sakit o laing ang hinungdan sa gidangatan sa biktima.
