CAGAYAN DE ORO CITY – Pakyas sa laing higayon makasulod sa opisina aron ipadayon ang gitahas ni Pres Bongbong Marcos pinaagi sa Local Water Utilities Administration si interim General Manager Fermin Jarales.
Kini human limitado gihapon ang access nga gihatag ni regular general manager Engr Antonio Young si Jarales makasulod sa Cagayan de Oro Water District bisan sa LWUA takeover niadtong Mayo ning tuiga.
Igo na lang sa paglili si Jarales sa sulod nga bahin sa employees entry sa COWD kay hugot ang baod ni Young nga limitahan na makasulod ang ubang personalidad nga dili regular o organic COWD workers.
Una nang gidali-dali’g okupar balik ni Young ang kanhi niya opisina dihang mihimo’g official business si Jarales sa kauluhan sa miaging semana.
Si Young ang magpila ka semana usab naibot sa iyang opisina kay mipuli si Jarales samtang nagpadayon ang mga lantuging legal sa gihimong lakang sa LWUA sa pipila ka local courts sa dakbayan.
Napaksyon ang COWD kay dunay mga empleyado nga padayong nagsuporta sa regular employees ug kabahin sa gaduyog sa inadlaw nga prayer rally ug may pipila usab nga nag-ila sa interim board of directors ingon man kang Jarales.
Nagsumikad ang bangi sa duha ka pundok tungod sa isyu nga dili mobayad ang COWD sa gisingil sa COBI nga sobra 400 milyones pesos nga utang subay sa pinirmahang kontrata nga nag-resulta pa sa temporaryong pagputol sa tubig sa miaging Mayo 2024.
Midangop sa korte ang pipila ka personalidad ug COWD rason nalugwaan sa preliminary injunction ang COBI ingon man mipatiwala usab si Pres Bongbong Marcos aron masiguro nga wala na’y subling pagputol sa suplay sa tubig.
Gikuwestiyon usab sa grupo ni Young ang LWUA takeover sa korte apan wala sila pabori rason nga dunay pending nga court ruling nga gihulat nila kontra grupo ni Jarales.
Nagsamot pa nagpainit sa tensyon ang legal opinion sa Department of Justice kay gihimong basehan ang Presidential Decree 198 nga wala sa hurisdiksyon ang LWUA magbutang sa interim officials sa COWD.
Samtang gihulat ang gipangayo sa regular COWD officials nga ruling sa korte,mi-takeover na’g una si Young balik sa iyang opisina rason nga si Jarales na usab ang napadaplin ning panahona.
Nanganti si Jarales nga mohimo usab sila’g legal nga mga aksyon sa pagbaliwala ni Young sa kasuguan sa national government nga gibutang ang interim board-management kay sulbaron ang natinga na nga kahimtang sa COWD.
