CAGAYAN DE ORO CITY – Moduso’g motion for reconsideration diretso sa korte suprema ang kampo ni kanhi kongresista nga si former city mayor Atty. Constantino Jaraula batok sa hukom sa Sandiganbayan sa kasong kurapsyon nga iyang giatubang.
Kini human gisulti sa korte nga sad-an si Jaraula sa pagsupak sa Anti-Graft and Corrupt Practices Act nunot sa pork barrel issue kaniadto sa negosyanteng si Janet Lim Napoles.
Miingon ang 87 anyos na nga si Jaraula nga sa korte suprema na sila mangayo’g konsiderasyon kay dismayado sa Sandiganbayan diin iyang giakusahan nga dunay abogado nga nangayo’g 10 milyones pesos aron ibasura ang kaso.
Namugos si Jaraula nga wala kini kalapasan nga nahimo sa balaod rason angay ibasura ang korte suprema ang kasong kurapsyon batok kaniya.
Sa gilugwa nga hukom sa korte,gisilotan si Jaraula nga bilangguon sa unom ka tuig ug usa ka bulan ngadto dekada.
Apan nalutsan usab sa kanhi House of Representatives outstanding congressman ang kasong malversation.
Dumduman nga una nang nadutlan sa pagka-konbikto si Jaraula sa kasong kurapsyon ug malversation ingon man sa direct bribery epekto sa transaksyon ni Napoles apan gi-apelar kini niya sa mas taas nga hukman sukad nalugwa ang hukom tuig 2021.
