CAGAYAN DE ORO CITY-Giawhag ni kanhi PNP regional director C/Supt Agripino Javier nga dili pasagdan ang kapolisan sa rehiyon ilabina sa mga panginahanglan niini.
Gihimo ni Javier ang awhag mismo sa iyang pag-retiro diin si PNP regional director C/Supt Timoteo Pacleb ang mihulip sa nabakante nga puwesto.
Giawhag usab ni Javier nga ipadayon ni Pacleb ang maayong mga programa ilabina ang anti-illegal drugs
campaign ug pagsanta sa terorismo.
Si Javier ang nagsilbing regional director sa PNP-10 sulod sa kapi’g 5 ka bulan sugod tuig 2016.
Gihangyo ni Pacleb ang tanang local govt units ug ubang law enforcement agencies nga tabangan siya sa pag-mintinar sa kahusay’g kalinaw sa Northern Mindanao.
Kini ilabina nga maayo ang gibilin nga performance sa gisundan niini nga si Javier nga nag-retiro na epektibo ning adlawa.
Si Pacleb ang miembro sa Philippine Military Academy Class of 1986 samtang si Javier ang nagsilbi niya nga upper class nga aktibong miembro usab sa PMA Class of 1985.
Dugtong niini,gimanduan ni PNP chief Dir Gen Ronald de la Rosa ang kapolisan sa rehiyon nga dili pasagdan ang bag-ong gitudlo nga si Pacleb sa Northern Mindanao.
Matud ni De la Rosa nga dili mahimo ni Pacleb ang tahas nga gisangon niya niini kon walay kooperasyon gikan sa PNP-10.
Si De la Rosa maoy nagsilbing pinasidunggan nga mamumulong atol sa turn over ceremony ni Javier ug ni Pacleb diha sa Camp Alagar ning syudad kaganihang buntag.
