Nakabati og kasubo ang lupon sa mga jeepney drivers sa grupong MANIBELA, sumala kang Mar Valbuena, chairman sa maong grupo, tungod kay dili tibuok ang nadawat nga fuel subsidy nga gisaad sa Department of Transportation (DOTr).
Sa pakighinabi sa Bombo Radyo, gipadayag ni Valbuena nga imbes nga ₱5,000, ₱1,500 ra ang nadawat sa pipila ka mga driver sa ilang grupo, samtang ang uban hangtod karon wala pa gyud makadawat bisan pa og naapil sila sa listahan.
Dugang pa niya, base sa ilang pag-monitor sa ground situation sa ubang lugar, klaro nga adunay kalahi-an sa kantidad nga midangat sa mga driver ug sa gisaad nga subsidy.
Nagpaabot sila og opisyal nga klaripikasyon gikan sa DOTr kalabot niini, ilabi na sa hinungdan nganong adunay kulang ug dili parehas nga pagpagawas sa ayuda.
Tungod niini, nanawagan ang MANIBELA nga repasohon ang proseso ug siguruhon nga ang fuel subsidy tibuok ug patas nga madawat sa tanang jeepney drivers sa nasod.
