CAGAYAN DE ORO CITY – Dili na mabasol sa pipila ka job orders o JO workers ang city govt kon nganong wala na sila mahatagi’g higayon nga malugwayan ang ilang pag-trabaho sa city hall ning syudad.
Kini ang prangka nga gipasabot ni City Mayor Klarex Uy nunot sa wala pagka-renew sa ubang JO workers gumikan sa pagpasagad sa ilang trabaho bisan kon gihatagan na sa kahigayon sa ba-gong administrasyon.
Miingon si Uy nga higayon na usab nga kon unsa man ang nahatag sa maong JO workers ang mapasa sa laing mga mas angayang maka-trabaho sa lokal nga pangagamhanan sa dakbayan.
Gitaga’g duha ka bulan ni Klarex sa tanang JOs aron mas ipalambo ang ilang serbisyo sanglit gikan sa grabeng krisis ang dakbayan gumikan sa pandemya.
Samtang gibaharan ni Uy ang mga empleyado sa city hall nga dili mangahas sa pagpangilad ngadto kaniya makakuha lamang sa promosyon sa trabaho.
Miingon ang mayor nga dili suliran kaniya ang paghatag sa job promotion sa mga empleyado apan angayang nominado ug suportado kini sa mismong ulo sa departamento.
Partikular nga gipasidan-an ni Klarex kadtong mga empleyado nga dugay na sa city hall apan pabiling anaa sa ubos nga katungdanan ang padayon nila nga gihuptan.
