CAGAYAN DE ORO CITY- Nalingaw pagsuroy-suroy si TV actor John Lloyd Cruz sa mga talan-awon nga makita sa kabarangayan sa lungsod sa Lanao del Sur.
Kini human unang hilom nga nagbakasyon ang actor sa pinuy-anan sa kanhi bise-mayor sa maong lungsod sa miaging semana santa.
Subay sa tinubdan sa Bombo Radyo,halos walay nakaila sa actor sa unang adlaw nga pagsuroy-suroy niini tungod sa bag-ong barog nga dili haom sa hitsura niya kon makit-an sa telebisyon.
Dugang sa impormasyon nga tungod sa ka ordinaryo tan-awon ni John Lloyd,gilabay-labayan lamang kini sa daghang tawo kay nagbaton naman kini sa bangas sukwahi sa postora niya sa iyang mga pelikula ug teleserye.
Si John Lloyd ang temporaryo una nga dili makita sa telebisyon sukad gika-relasyon si actress Ellen Adarna diin sila nagbaton na sa ilang unang anak.
