CAGAYAN DE ORO CITY – Gisugdan na sa China ug Russia ang labing una, ug makasaysayanong Maritime Patrol sa Indo-Pacific Region.
Partikular nga gipadagan sa duha ka dagkung nasud ang ilang mga barkong igugubat sa Dagat Pasipiko, sugod kagahapong adlawa.
Lakip sa ilang ekspidisyon ang Dagat Bering duol sa kadagatan sa Alaska.
Segun sa protocol, magbalik-balik sa duha ka higayon ang pagpatrolya.
Dungan sa ilang pagbiyahe ang pagpalupad sa Russian Bombers ibabaw sa Dagat sa Bering.
Kini pa ang unang higayon nga milusad sa joint-navy patrol ang China ug Russia sa amihanang porsyon sa Pacific Area.
Gitin-aw sa duha ka nasud nga wala silay target sa maong operasyon.
Sa pikas bahin gireport sa US-Canadian North American Aerospace Defense Command (NORAD) nga aduna silay na-intercept nga pipila ka jet bombers nga naglupad ibabaw sa international space apan wala kini magpakita sa dakung hulga.
Apan si Alaska Senator Lisa Murkowski misaway sa lihok sa duha ka nasud ug namulong nga kini usa ka matang sa probokasyon sa ilang nasud.
