
Andam na si ONE Strawweight MMA World Champion Joshua “The Passion” Pacio sa pagpanalipod sa iyang kampeonato batok sa Japanese challenger nga si Keito “Pocket Monk” Yamakita sa main event sa ONE SAMURAI 5 sa EBARA WAVE Arena Ota sa Tokyo, Japan, karong Miyerkules, Nobyembre 18.
Gipahayag ni Pacio ang iyang kalipay ug pasalamat sa higayon nga makigsangka pag-usab sa Japan, diin determinado siyang makabawi sa iyang miaging kapildihan sa nasud ug mapabilin ang iyang titulo.
Matud niya, hingpit siyang nangandam alang sa maong away, ilabi na sa pag-atubang sa lig-on nga grappling ug submission skills ni Yamakita, nga iyang giingong usa ka takus ug delikadong challenger.
Mosulod si Yamakita sa away nga nagdala og 13-1 nga kinatibuk-ang professional MMA record, 6-1 nga rekord sa ONE Championship ug lima ka sunod-sunod nga kadaugan, samtang gilauman usab nga matawo ang iyang unang anak nga lalaki usa ka adlaw human sa kampiyonatong away.
Bisan pa sa kalibre sa iyang kontra, nagpahayag si Pacio sa pagsalig sa iyang pagpangandam ug sa iyang mas napalambo nga abilidad sa ground game, samtang nagtinguha siyang malampusong mapanalipdan ang iyang kampeonato. (raniel mahunyag)










