CAGAYAN DE ORO CITY-Giklaro sa Joint Task Force Marawi nga tulo lamang ug dili 26 ka sundalo ang namatay dihang nabuthan sa improvised explosive device o IED sa Banggulo Bridge sa Marawi City sa miaging adlaw.
Katin-awan kini ni Joint Task Force Marawi spokesperson Capt Joan Petinglay tungod sa nanggawas nga report nga daghan sa ilang mga sundalo ang nakalas atol sa IED explosion.
Giangkon hinoon niini nga laing 52 ka sundalo pa ang samaron samtang naningkamot mapuhag ang nabiling teroristang Maute-ISIS diin kadaghanan kanila ang nadala sa Camp Evangelista Station Hospital dinhi sa syudad.
Padayong gibantayan sa mga sundalo ang mga gipangtanom nga mga bomba sa mga terorista tungod kay gitoohan daghang mga IEDs pa ang gipakatag sa mga lugar paduol sa ilang gitaguang kota.
