CAGAYAN DE ORO CITY – Gikompirmar sa buhatan ni City Mayor Rolando ‘Klarex’ Uy nga wala naapil sa listahan sila incumbent City Councilors Atty James Judith ug Malvern Esparcia nga dad-on sa 2025 elections dakbayan.
Kini human unang naglugwa sa official line up ang grupo ni Cong Rufus Rodriguez diin lahi nga mga kandidato ang gidala nila sa pagka-konsehal sa una ug ikaduhang distrito sa syudad.
Miingon si Janboy Actub,tigpamaba ni Mayor Klarex nga kon unsa man ang namantala ug nakit-an sa publiko nga naa sa listahan,halos pinal na kini ug gamay na lang ang angay usbon.
Gitagak si Judith ug Esparcia tungod sa sekreto nga giingong pagbalhin niini sa partido.
Samtang namahayag usab si Judith nga pakusgon na lang niya ang iyang kruada nga ‘asdang’ sa pagpadayon sa politikahon nga paglawig niini sa dakbayan.
Kini human gidawat na niini kuyog si Esparcia nga wala sila tagda sa duha ka grupo bisan nga sila managsama nga incumbent officials.
Miingon si Judith nga bintahan ang dunay partido apan mismo ra gihapon ang katawhan ang dunay dako’g papel aron ang mga kandidato makadaug ug makakupot sa katungdanan sama sa ilang nahuptan.
