CAGAYAN DE ORO CITY, Philippines – Dili mominus sa 120 ka mga persons deprived of liberty (PDL) sa male dormitory sa Bureau of Jail Management and Penology (BJMP) ang benepisyaryo sa libreng-legal nga edukasyon pinaagi sa Clinical Legal Education Program (CLEP) sa Liceo de Cagayan University – College of Law.
Gibutyag ni Jail Senior Inspector Rene Michael Guangco, Deputy Warden sa BJMP Cagayan de Oro Male Dormitory nga kini nga programa gidesinyo aron mulapad ang pagsabot sa mga piniriso sa ilang legal nga katungod, ug kung usa ang proseso sa pag-aginod sa ilang gikalambigitan nga mga kaso.
Photo Courtesy: Nef Luczon (PNA)
Ang CLEP nga gi-organisar ni LDCU – College of Dean ug Lawyer Dr. Manuel Cabrera.
Masaligon si Dr. Cabrera nga mulambo ang kinabuhi ug panglantaw sa mga piniriso kung mahatagan sila’g “second chances”, oras nga madasig sa pagpartisipar sa CLEP.
Una niini, milagda sa memorandum of agreement (MOA) ang BJMP National Directorate ug sa Philippine Association of Law Schools, aron ipatuman ang CLEP sa tibuok nasud.
Tipik sa hisgutan sa programa ang proseso sa rehabilitasyon sa mga piniriso sa dili pa sila mahibalik sa katilingban.
Ang CLEP usa ka interactive nga kurso nga mubaid sa kapas sa mga Law Students, aron mahimong hanas ang ilang praktikal nga kasinatian sa paggamit sa balaod, ug paghatud sa mga serbisyong legal ug pagpasiugda sa hustisya sa katilingban.
Ubos niining programa ang pagsalmot sa tanan interesadong PDL sa walo ka sesyon sulod sa lima ka bulan.
