CAGAYAN DE ORO CITY – Dul-ag 20 ka tawo ang nahilo human mikaon sa “puffer fish” o isdang butete sa Ozamis City.
Base sa report nga gilugwa sa Ozamis City Health Office, dali nga gidala sa ospital ang mga biktima nga nakasinati sa pagsuka-suka, ug pagkahilo human mikunsomo sa butete.
Una niini, usa ka residente sa baybayong dapit sa syudad ang nakabingwit sa upat ka puffer fish ug giluto.
Gi-apud sa wala gipanganlan nga biktima ang nilutong isda sa iyang mga silingan hinungdan nga tanan mikaon niini ang pulos landing sa balaytambalanan.
Hinoon, nakakuha pa sa sampol sa isda ang Department of Health ug gipaubos sa lawon nga pakisusi.
Hisayran nga base sa siyensa, delikado ang butete kay kini iladong makahilo nga isda.
