CAGAYAN DE ORO CITY – Patay ang usa ka mag-uuma samtang laing usa ang samaron human gipusil sa gitoohang miyembro sa 88IB Philippine Army sa Brgy. Linabo, Quezon Bukidnon.
Giila ni KARAPATAN Secretary General Datu “Matugas” Wilson Anglao Jr, ang namatay nga si Alex Lacay, 34, miyembro sa Bukidnon Lumad organizarion KASILO ug usa ka mag-uuma.
Samaron sab ang iyang kauban nga si Renard Burgos.
Base sa pamahayag ni Burgos, misakay sa ilang motor ang duha ka tawong naka-uniporme sa sundalo nga dunay badge nga 88IB.
Pila ka kilometro gikan sa merkado gikan Brgy. Linabo padulong Brgy Salawagan, kalit nga namusil ang ilang mga backride nga mga umipormadong sundalo.
Paspas nga nakadagan si Burgos human matapsingan ug dead on the spot si Lacay.
Naka-angkon sa daghang igo-pinusilan si Lacay.
Duha sa iyang ulo ug upat sa iyang tiyan.
Miingon si Datu Matugas nga kini na ang ika-12 nga ihap sa pagpatay sa mga mag-uuma nga gituohang sakop sa New Peoples Army.
Gikonsiderar sa grupong KARAPATAN nga usa ka klase sa extra-judicial killings ang hitabo.
Samtang gisupak ni 88IB Commader Army Lt. Franklin Fabic ang pamahayag sa KARAPATAN.
Namugos si Lt. Fabic nga wala misibo sa report sa PNP-Bukidnon ang report ni Datu Matugas.
Gibutyag ni Fabic nga kuyog silang miresponde sa Bukidnon PNP human mikatag ang report sa shooting insidente sa Brgy Salawagan.
Gikompirmar ni Fabic ang pagkamatay sa usa ka Alex Lacay ug pagka-angol sa iyang kauban nga si Renard Burgos.
Hangtud karon pabiling at large ang duha ka gunmen nga namusil sa duha ka miyembro sa lumad organization.
Sa pagkakaron, pulos muhatag sa assistance ang grupong KARAPATAN ug 88IB sa pamilyang nabiyaan ni Lacay.
Legal assistance ang ihatag sa KARAPATAN, samtang seguridad ug ayudad ang itunol sa 88IB.
