CAGAYAN DE ORO CITY, Philippines – Misaka pa sa 226 ang patay sa pagkusu-kuso sa Bagyong Yagi sa Myanmar.
Namahayag ang Information Team sa Myanmar’s State Administration Council nga mukabat na sa 438 temporary shelters ang ilang gibuksan ug gitukod aron maakomodar ang kapin usa ka milyon ka mga pamilya nga nabanlas sa baha ang ilang balay nga gama lamang sa light materials.
Maoy grabeng gilamopurna sa bagyo ang mga lugar sa Kayah, Kayin, Bago, Magway, Mandalay, Mon, Shan, Ayeyarwady, ug Nay Pyi Taw Union Territory.
Nadamyos sa baha ang 2,116 ka mga puy-anan, 117 gambalay sa ilang gobyerno, 1,040 ka mga tunghaan, 386 religious buildings, ug hangtud karon, humod pa sa baha ang ilang kapin 260,000 ektarya sa kahumayan, mais, ug uban pang mga high valued crops sama sa gulay ug prutas.
Napatay sa baha ang kapin 129,000 ka binuhing baboy, kanding, manok, ug kabaw. Hisayran nga human sa Pilipinas, Vietnam, ug Laos, sunod nga gilampurnas sa Super Typhoon Yagi ang Myanmar.
