CAGAYAN DE ORO CITY, Philippines – Gimando ni Haiti Prime Minister Garry Conille ang subsob nga imbestigasyon sa pagbusikad sa oil tanker sa dalan sa Miragoane City nga gikamatay sa 25 ka tawo ug laing 40 ang kritikal.
Subay sa report, pulos nagbaton sa 3rd degree burns o grabeng pagkasunog sa pamanit ang mga biktima.
Miingon ang nakasaksi nga buslot na daan ang tanker ug gidali dali sa mga pahenante nga salaon ang nag-agas nga lana.
Miresulta kini sa pagbusikad dihang gibanggan kini sa laing salakyan.
Hisayran nga migamit pa sa chopper ang ilang mga otoridad aron ma-airlift ang mga labing talandugunon nga mga pasyente.
Lakip sa gisil-ip nga angulo sa hitabo mao ang terorismo, paghigh-jack sa tanker ug pagpangawat sa lana.
