CAGAYAN DE ORO CITY, Philippines – Misaka pa sa 52 ka tawo ang patay sa dili muminos lima ka airstrike nga gilusad sa Israeli Defense Force sa managlahing lokasyon sa Gaza Strip, sukad Agosto 20.
Siyam ka bata ang patay kagahapon adlawa, human gitarget sa military strike ang tunghaan sa Khan Younis City.
Lakip sa gi-atake sa IDF ang usa ka tunghaan, residential area, merkado, mobile phone charging station ug abandonadong residential building sa Amihanang Gaza.
Nabahin ang reaksiyon sa mga katawhan sa apektadong lugar human pipila kanila ang mikondinar ang padayong pagtagu-tagu sa Hamas Militants sa ilang probinsya.
Gimaldisyon sa grupo sa kababaihan si Israeli Prime Minister Benjamin Netanyahu ug ang gobyerno sa Amerika sa padayong pag-atake sa ilang mga puy-anan ug pagkamatay sa ilang anak.
Mahinumduman nga gidawat sa gobyerno sa Israel ang tanyag nga ceasefire sa Amerika human gibisita ni US Secretary of State Anthony Blinken ang embahada sa Jerusalem, sa miaging adlaw.
Apan hangtud karon, nagpadayon ang airstrike sa IDF sa mga lugar nga gitumbok isip hideouts sa Hamas militants.
