CAGAYAN DE ORO CITY, Philippines – Gipangandaman na sa Department of Social Welfare and Development (DSWD) ang posibleng dakung epekto nga dala sa Tropical Depression (TD) Julian sa Pilipinas.
Namahayag si Assistant Secretary for Disaster Response Management Group (DRMG) Irene Dumlao, nga naka-preposition na ang ilang family food pack sa Region 1, sa mga lugar nga agi-an sa bagyo, subay sa forecast track nga ilang nakuha sa government weather bureau.
Gibutyag ni Dumlao nga mukabat sa 153,575 family food packs (FFPs) ang anaa sa ilang city ug regional DWSD offices sa mga probinsya sa Ilocos Norte, Ilocos Sur, Cagayan, Apayao, Mountain Province, Abra, Benguet, ug Kalinga.
Gawas niini, gitin-aw sa kalihim nga kagahapon pa lang, naka-preposition na usab ang mga FFPs sa probinsya sa Bukidnon ug Misamis Oriental tungod sa grabeng pag-ulan ug baha, subay sa report nga ilang nadawat sa mga field offices sa maong lugar.
Mukabat sa 17,621 food packs ang nakapreposition sa duha ka apektadong probinsya sa Northern Mindanao.
