CAGAYAN DE ORO CITY – Walo na ang hawid nga MVP Trophy ni San Miguel Beermen Cager June Mar Fajardo.
Karong gabie, gitunol sa Philippine Basketball Association (PBA) ang Most Valuable Player (MVP) award kang Fajardo sa gipahigayong Leo Awards sa Smart Araneta Coliseum sa Quezon City.
Gawas nga siya ang nag-una sa statistical points (SPs) sa miaging liga, gipanguluhan gihapon ni Fajardo ang pagbaton sa pinakadaghang boto gikan sa media ug sa iyang kaubang magdudula.
Kailog ni Fajardo sa maong titulo ang iyang teammate nga si CJ Perez ug Terrafirma player Christian Standhardinger.
Si Fajardo mihipos sa 2,799 puntos, itande sa 1,951 ni Perez, ug 1,731 kang Standhardinger.
Hisayran nga ang tolo ka mga kandidato sa pagka-MVP mao usab ang nangulo sa Mythical First Team, kauban sila si Arvin Tolentino sa Batang NorthPort ug Chris Newsome sa Meralco Bolt.
Ang rookie of the Year nahatag kang Stephen Holt maoy nangulo sa Mythical Second Team, giubanan nila Cliff Hodge, Calvin Oftana, Jason Perkins ug Juami Tiongson.
Nagsilbing All-Defensive Team sila Fajardo, Newsome, ug Hodge, kuyog nila Joshua Munzon sa Batang Pier ug Kemark Carino sa Dyip.
Si Jhonard Clarito sa Rain Or Shine maoy napiling Most Improved Player, samtang si Paul Zamar nakadawat sa Sportsmanship Award.
