CAGAYAN DE ORO CITY – Human sa pito ka tuig nga pagtagu-tago, hingpit na dakpan sa Intelligence Operatives sa Provincial Intelligence Branch – Provincial Special Tracker Team (lead unit) nga gipanguluhan ni Police Capt Vincent Claud, ang usa ka illegal recruiter sa mga overseas filipino worker nga gustong manarbaho sa Saudi Arabia.
Giila ni Captain Claud ang nasikop nga si Crisilyn Rubi Batican, 39 anyos, usa ka OFW sa Kingdom of Saudi Arabia, ug residente sa Purok 01, New Compostela Valley, Damulog, Bukidnon. Unang nalugwa ang warrant of arrest sa suspek niadtong Hunyo 28, 2013 ubos sa sala ni Presideng Judge Charito Gonzales, sa RTC-NCR- Branch 80 Quezon City.
Nag-atubang kini sa kasong illegal recruitment ug walay piyansa nga girekomendar sa korte.
Gawas niini, gipasak-an sab kinig tolo ka ihap sa estafa nga nagtangag sa P18-mil nga piyansa matag usa, ug duha ka ihap sa libel nga gi-isyu sa sala ni Presideng Judge Dennis Alcantar, sa 10th Judicial Region sa Branch 18, ning syudad ug gipagawas niadtong Hulyo 17, 2018 kundiin nagbalor ang iyang piyansa sa P48-mil matag usa.
Samtang, laing kasong libelo ang gi-atubang sa suspek sala ni presideng Judge Emmanuel Pasal sa 10th Judicial Region, Branch 38, ning syudad ug mirekomendar ang korte sa P20-mil piyansa.
