CAGAYAN DE ORO CITY, Philippines – Patay ang usa ka army intelligence officer ug laing tolo ka sundalo ang angol sa pagbusikad sa bomba sa Kirkuk Province Iraq.
Giila ang nakabsan nga si Lieutenant Colonel Laith al-Hayali nga nakadeploy sa Iraqi Army’s 8th Division Intelligence Service.
Segun sa report, namatay ang opisyal dihang nalatayan sa ilang sakyanan ang gitanom nga bomba distrito sa Dibis.
Paspas nga miresponde ang Iraqi Forces sa crime scene ug gisulayan pa’g luwas ang ilang opisyal.
Dinaliang gidala sa Kirkuk General Hospital, ang mga samaron.
Sa pagkutlo ning balita, wala pa’y grupo nga mi-angkong responsabli sa hitabo.
Hisayran nga padayon gihapon ang pagtanum sa eksplosibo sa managlahing lugar sa Iraq taliwala nga nakontrolar na balik sa ilang gobyerno ang kalinaw sa nasud gikan sa pagpangatake sa pipila ka extremist militants ug Islamic State group, sugod tuig 2017.
