CAGAYAN DE ORO CITY, Philippines – Naka-abot na sa US Embassy sa Jerusalem si United States Secretary of State Anthony Blinken.
Apan pipila ka minutos sa iyang pagsulod sa embahada, gi-anunsyo sa grupong Hamas nga sila ang responsabli sa pagbombardiyo sa syudad sa Tel Aviv.
Taliwala sa kakurat, gipadayon ni Blinken ang iyang gitakdang pakigtagbo kang Israeli Prime Minister Benjamin Netanyahu, Israeli President Isaac Herzog ug mga military advisers sa gobyerno sa Israel.
Milampos si Blinken sa misyon nga gisapnay kaniya ni US President Joe Biden nga dawaton ang tanyag nga “momentary ceasefire”.
Human sa pagpulong gitapos ni Blinken ang iyang pagbisita sa Israel sa media briefing ug gihagit ang grupong Hamas nga muhimo sa ilang obligasyon pagpatunhay sa kalinaw sa Gaza Strip.
Una niini, giila sa gobyerno sa Amerika ang pagpaningkamot sa kadagkunan sa Ehipto, Jordan ug Qatar nga ipa-abante ang ceasefire sa Gaza aron maayudahan ang mga naipit sa gubat.
