CAGAYAN DE ORO CITY, Philippines- Misaka pa sa 629 ang patay sa Monkey Pox sa Republic of Congo. Subay sa labing lab-as nga report sa World Health Organization, dunay dugang 5,000 ka kaso ug 31 ang bag-uhay lang nakabsan sa Sidlakang probinsya sa maong nasud.
Mibati’g kabalaka si WHO Secretary General Tedros Ghebreyesus sa report nga ilang nadawat nga dunay bag-ong kaso sa Clade 1 Mpox ang natala na sa South Kivu Province, ilabe nga sagad sa mga mitakboy sa mga pasyente sa maong nasud gikan pa sa Clade 2 MPOX.
Sa milabay’ng semana, gikompirmar ni Ghebreyesus nga duna nay lima ka nasud sa Central Africa nga pulos CLADE-1 Mpox ang mitakid.
Kagabie, sa gilusad nga media briefing gibutyag ni Ghebreyesus nga duna na silay listahan sa mga nasud nga sertipikahan sa “emergency use” sa bakuna nga mubatok sa MPOX.
Ang mosertipika niini nagsumikad sa mga eksperto sa Gavi, the Vaccine Alliance ug sa WHO.
