CAGAYAN DE ORO CITY – Gibasura sa Court of Appeals (CA) 22nd Division sa Cagayan de Oro City ang Temporary Protection Order (TPO) nga giisyu sa Regional Trial Court (RTC) Branch 15, sa Davao City, niadtong Agosto 27, pabor sa Kingdom of Jesus Christ (KOJC) Church.
Sa lima ka pahina nga resolusyon nga gisyu sa Appellate Court, nasuta nga ang RTC Branch 15 milihok nga walay awtoridad sa pag-ila sa petition for writ ni Amparo.
Busa, gideklarar sa korte nga “null and void” ang Temporary Protection Order (TPO) nga giisyu sa Davao.
Una niini gitin-aw sa CA nga ang TPO gi-isyu sa regional trial court isip “temporary relief” sa kaguliyang sulod sa compound, ug samtang gihulatan pa ang hukom sa writ of Amparo petition nga gisang-at sa KOJC.
Ang mga petitioners gilangkoban nila KOJC Executive Pastor Marlon Acobo, ug Jose Maria College Foundation Inc. (JMCFI).
Gisang-at sa KOJC ang petition for the Writ of Amparo niadtong Hulyo 1 batok kang Interior ug Local Government Secretary Benjamin CAbalos ug sa Philippine National Police, kinsa mihimog lapad nga human rights voilation atol sa ilang pag-atake sa KOJC Compound sa Davao City.
Ang abogado sa simbahan nga si Israelito Torreon, mikompirmar nga nadawat na ila ang kopya sa CA Resolution, niadtong Miyerkules.
Busa ang ilang legal team gilayong misang-at sa motion for reconsideration (MR) sa maong adlaw.
Nagtoo si Torreon nga dili pa “final and executory” ang hukom sa CA ilabe na nga may katungod ang ilang mga kliyente nga mu-file sa MR aron mapalig-on ang ilang giduso nga TPO.
