CAGAYAN DE ORO CITY – Landing sa Northern Mindanao Medical Center ang usa ka 51 anyos nga taxi driver human nagtumar sa sex-enhancer samtang nakigkombati sa usa ka ‘babayeng mugbo ang lupad’ sa Brgy. Consolaccion, ning syudad.
Namahayag si Police Major Ian Borinaga, hepe sa Carmen Police Station, nga nahitabo ang insidente sulod sa Cubucle Inn, kundiin, iladong kustomer ang nasampit nga biktima sa maong dapit.
Base sa pamahayag sa usa ka alyas Mylin, 31 anyos, muhimo pa unta sila sa ilang second round sa pagkumbati apan nabalda kini tungod kay nakitang niyang misulirap ang mata, naglisud sa ginhawa, ug nagbula-bula ang baba sa iyang kostumer nga taxi driver.
Sa pagkakaron, pabiling talandugunon ang kahimtang sa biktima.
Si City Councilor Dr. Reuben Daba, co-chairman sa Committee on Health and Sanitation miingon sa Bombo Radyo nga dili aprobado sa Food and Drugs Administration kon FDA ang mga itumada nga sex enhancer busa dili sila muhatag sa resita niini.
Iyang gi-awhag ang mga kalalakihang nag-edad 40 pataas nga ikonsulta sa mga doktor ang ilang paggamit sa sex enhancer tablets tungod kay pwede ikamatay sa tawo ang overdose o sayop nga paggamit sa mga pampagana sa pakihilawas.
