Nasanta sa 1001st Maneuver Company, Regional Mobile Force Battalion 10 (RMFB10), kauban ang Magsaysay Municipal Police Station, 1st Provincial Mobile Force Company of Misamis Oriental PPO, TSC RMFB10, ug RID-10, ang P32,720,000 kantidad sa gi-ismagol nga sigarilyo sa back-to-back anti-smuggling operation sa Magsaysay, Misamis Oriental.
Bandang alas 1:50 sa hapon sa Biyernes Santo, gilusad ang intelligence-driven operation human makadawat sa tip nga adunay wing van nga puno sa smuggled cigarettes.
Nagpositibo ang operasyon ug nasanta ang van. Wala madakpi ang drayber kay mikagiw kini sa dili matino nga direksyon ug gibiyaan ang van nga nakaparking sa national highway.
Sulod sa van narecover ang 496 master cases sa smuggled cigarettes nga walay graphic health warning labels ug excise tax stamps. Lakip sa mga brand nga nasanta mao ang Green Hills, New Orleans, Casablanca, ug Modern cigarettes.
Sa laing operasyon bandang alas 4:40 sa hapon sa Purok 5, Brgy. Candiis, Magsaysay, nakasapon ang mga otoridad sa usa pa ka abandonadong wing van truck nga gituohang puno usab sa smuggled cigarettes.
Sa pagbukas niini, nagpositibo kini sa 322 master cases nga nagbalor sa P12,880,000. Gitakdang i-turnover ang mga kontrabando sa Bureau of Customs sa adlaw’ng Lunes.
