CAGAYAN DE ORO CITY, Philippines – Gibungkag na sa Santo Papa sa Roma ang Peruvian Catholic Group – Sodalitium Christianae Vitae tungod sa lapad nga isyu sa kurapsyon ug pagpangabuso nga milungtad sa kapin usa ka dekada sukad nag-operar ang maong simbahan sa Peru.
Ang pagbungkag nagsugod human mismo ang founder niini nga si Luis Fernando Figari, giakusahan nga midagmal sa pipila ka mga sibilyan ug miyembro sa simbahan, ingon man giakusahan nga nangurakot sa kwarta sa simbahan.
Ang Sodalitium Christianae Vitae adunay gibana-bana nga 20,000 ka mga miyembro lakip na ang ilang simbahan sa Estados Unidos. Gihimakak ni Figari ang tanan nga alegasyon batok kaniya sa Holy See.
Mahinumduman nga sa nanglabay nga tuig, nagpadala si Pope Francis ug mga imbestigador sa Peru aron susihon ang dili-tawhanong mga lihok sa simbahan ug nagpakita sa iyang suporta sa resulta sa gilusad nga imbestigasyon.
Una nang namahayag ang opisina sa The Holy See nga gikomitar sa Santo Papa ang pagsanta sa kurapsyon sa mga simbahan nga nagpasilong sa Vatikano, lakip na ang pagpitol sa kahiwian sa pipila ka mga abusadong kaparian sa tibook kalibutan, aron maproteksyon ug hatagan sa hustisya ang ilang mga biktima sa pagpangabuso.
