CAGAYAN DE ORO CITY, Philippines – Bastante pa ang supply sa asukar sa Pilipinas kutob sa ikaduhang kwarter sa 2025.
Gibutyag sa Sugar Regulatory Administration (SRA) nga pabiling lig-on ug walay pagsaka sa suggested retail price produkto sa merkado, subay sa labing ulahing monitoring ni SRA chief Pablo Luis Azcona.
Miingon ang ahensya nga ang presyo sa refined sugar sa Metro Manila anaa sa P74-P95/kg; P68-90/kg ang sentral; ug P65-90/kg sa brown sugar.
Gikompirmar ni Azcona nga duna pa sila’y gihulatan nga 240,000 MT imported refined sugar aron mamintinar ang buffer stock ug presyo sa asukar sa Merkado.
Lauman kining muabot sa Oktobre, ning tuiga.
Segun sa Sugar Order no.1, ang Sugar production alang sa tuig 2024-2025 gikan Setyembre 1, padulong sa Agusto 31, 2025, gibana-nana sa 1.78 million metriko tonelada, ug kining tanan alang sa ‘domestic use’.
Mi-angkon ang SRA nga kini nga projection, dunay dyutay nga pag-ubos itande sa 1.92 million MT production sa tuig 2023-2024.
