CAGAYAN DE ORO CITY – Gihatagan sa deadline sa Ozamiz City Police Office ang mga gibulgar nga tigpayuhot sa ilegal nga druga sulod sa Public Attorneys Office o PAO ug Parole and Probation Office sa Ozamis City, ayha niini ipadala ang ilang mga ngalan sa buhatan sa Malakanyang.
Gibutyag ni Ozamiz City Police Office commander Police Maj Jovie Espenido nga mismo ang ilang nadakop nga warrant ug subpoena server sa Regional Trial Court Branch 15 ang mitug-an nga duna siya’y kasunsabo ug kaila sulod sa duha ka buhatan sa gobyerno nga nalambigit sa ilegal nga kalihukan.
Namahayag ang dinakpan nga si Rolando Ruiz nga dili lang siya ang gapamaligya sa shabu ug dunay mga empleyado sulod sa PAO ng Probation office ang iyang nailhan nga dealer sa ilegal nga druga.
Una niini, namahayag si Police Major Espenido nga kutob ra Setyembre 8, 2019 ang iyang paghulat sa mga HVT o High Valued Target drug listed personality ayha nila isumiter ang ilang mga ngalan sa Drug Watchlist ni Presidente Rodrigo Duterte.
Mihangyo pa si Espenido nga mas maayong mag “voluntary surrender” ang mga gapanaligya ug tigamitan sa druga sulod sa duha ka buhatan aron dili maulawan.
