CAGAYAN DE ORO CITY – Nadakpan sa operatiba sa Ozamis City ang mismong warrant ug subpoena server sa RTC Branch 15 Ozamis human gilusad ang drug buy bust operation, kagahapon.
Giila sa Ozamis City PNP ang suspek nga Rolando Ruiz, 52 anyos ug residente sa Aguada Ozamiz City.
Nakuha sa posisyon ni Ruiz ang 50 gramos nga gitoohang shabu nga nagkantidad sa kapin tunga sa milyon ka pesos.
Narekober sa suspek ang drug paraphernalia, employee ID, ug 1000 pesos nga buybust money.
Gikonsiderar nga high Valued target ang suspek. Sa inisyal nga imbestigasyon nga gihimo sa kampo ni PMaj Jovie Espenido, city police director sa Ozamis, nadiskobrehan nga si Ruiz maoy tigdawat sa shipment sa shabu gikan sa Cebu agi sa pantalan sa Ozamiz.
