CAGAYAN DE ORO CITY, Philippines – Pinal na ang desisyon ni US President Donald Trump nga pahamtangan sa 25 porsiento ang taripa sa imported nga mga produkto gikan sa Canada ug Mexico.
Sa press conference nga gilusad sa White House, miingon si White House spokesperson Karoline Leavitt nga gawas sa duha ka nasud, laing 10% nga taripa batok Chinese products ang gimando ni Trump nga ma-implementar, sugod adlaw Sadado.
Tungod sa bag-ong mandato, taas ang tsansa nga mamiligro ang dul-an $1.6 trillion sa binayluay sa mga produkto tali sa mga kanasuran ang nahimutang sa North America.
Kini nagpasabot nga gituldukan na sa Trump administration ang 30 ka tuig nga free trade system tali sa Canada ug Mexico.
Ang trade war sa Amerika tali sa tolo ka nasud nag-ugat sa tinguha ni Trump nga idominar sa Amerika ang global market pinaagi sa pagpakusog sa bili sa ilang salapi, ang US-Dolyar.
