CAGAYAN DE ORO CITY, Philippines – Gideklarar na sa World Health Organization ang “Humanitarian Crisis” sa Sudan, gumikan sa nagsaka nga kaso sa cholera.
Namahayag si Sudanese Health Minister Haitham Mohammed Ibrahim nga sukad Hulyo 23 mitala ang ilang nasud sa kapin 600 nga nagsakit ug dul-an 30 ka tawo na ang nakabsan tungod sa epidemya.
Gibasol ni Dr Ibrahim ang padayong pagpangatake sa paramilitary group nga Rapid Support Forces (RSF) sa kasundaluan sa Sudan nga maoy hinungdan sa pagkaguba sa ilang mga pasilidad, tulay ug dalan.
Gawas niini, ang walay hunong nga ulan maoy nagpasamot sa pagkontaminar sa ilang tubig-mainom.
Dili na bag-o ang cholera outbreak sa Sudan.
Niadtong 2017, ang nasampit nga sakit mikutlo sa kapin 700 ka tawo, ug 22,000 ka mga residente ang naigo sa impeksyon sulod lamang sa duha ka bulan nga pagkuyanap sa sakit.
