GIPAMATUD-AN ni kanhi National Security Adviser ug Secretary of National Defense nga si Norberto Gonzales ang kahuyang sa justice system sa Pilipinas human sa paghatod sa gobyerno sa nasud kang former president Rodrigo Duterte ngadto sa International Criminal Court.
Sumala ni Gonzales, ang maong hitabo usa ka dili maayong indikasyon nga ang sistema sa hustisya sa Pilipinas wala makalihok sa kaugalingong kapasidad, hinungdan nga napugos ang gobyerno sa pagdala sa kaso ngadto sa laing korte sa gawas sa nasud.
Butyag pa niya, sa dihang gipahibalo sa ICC ang pag-ila sa mga giingong co-perpetrators sa kasong crimes against humanity batok kang Duterte, panahon na kini aron pamatod-an nga ang justice system sa Pilipinas adunay “ngipon” ug makahimo sa pagpanubag sa mga giingong sad-an dinhi mismo sa nasud.
Matod pa ni Gonzales, dili angay nga magsalig kanunay ang Pilipinas sa gahum sa internasyonal nga korte, ilabi na kon ang mga alegasyon mahimo man unta husayon pinaagi sa lokal nga mga korte.
Naghinaot siya nga sa umaabot, ipakita sa gobyerno nga andam ug may kakayahan ang nasud sa paghatag og hustisya nga walay pagsalig sa gawasnong institusyon. (James Oliver)
