Pinaagi sa kantang Born this Way ni Lady Gaga, miladlad ug mitugan na si K-pop boy group Just B member Bain nga siya miyembro sa LGBT Community.
Gihimo ni Bain ang pagtug-an human kini milusad sa iyang solo concert sa Los Angeles California, sa milabay’ng adlaw.
Hisayran nga nagtrending dayon sa youtube ug ubang pang video sharing site ang iyang pag-angkon, apan wala niya klaroha kung siya ba bay-ot o bisexual.
Una niini, daghan sa iyang mga fans ang nalipay sa iyang pag-anunsyo sa wala pa masugdi ang iyang konsierto sa Vermont Hollywood.
Gi-angkon ni Bain nga usa si Lady Gaga sa naghatag kaniya’g inspirasyon aron ipadayon ang iyang karera. Gawas sa pagkanta sa Born This Way, iya usab gi-awit ahg Judas isip tribute sa iyang idoli.
Nakadawat sa init nga pagsuporta ang pag-angkon sa singer ilabe sa iyang kauban sa banda nga si Siwoo, kinsa nahimong emosyonal ug nakahilak samtang naglantaw sa performance ni Bain.
Ang Just B usa ka K-pop group nga natukod niadtong 2021 ug adunay unom ka miyembro.
Sila nakapagawas na sa lima ka album, lakip ang ilang pinakabag-o nga nag-uluha’g “Just Odd” nga nigawas niadtong Marso 2025.
