CAGAYAN DE ORO CITY – Makahimo’g pag-responde bisan unsang orasa ang tropa sa Police Regional Office 10 kung adunay mga kalamidad o trahedya nga epekto sa lihok sa kinaiyahan.
Kini human panguluhi ni PRO 10 regional director Brig Gen Jaysen De Guzman ang PNP simultaneous annual inspection of disaster response equipment sa Kampo Alagar alayon pagsulod na sa ting-ulan nga tiyempo sa Northern Mindanao ning bahina sa tuiga.
Matud ni De Guzman nga ang maong lakang ang kabahin sa gitawag nga ‘proactive efforts’ sa PNP agi’g abante nga preparasyon batok sa mga paglihok sa kinaiyahan susama sa pagbaha o mga pagdahili sa kayutaan diin kinahanglanon ang presensiya sa kapolisan.
Siya miingon nga dili lang kini kutob sa protocol apan nagsalamin kini sa kaakuhan sa kagamhanan panalipdan ang katilingban sa matag-higayon nga adunay krisis.
Kini ang rason nga gisusi ang mga kagamitan pang-responde samtang kini gihikyad sa covered court sa Alagar ning semanaha lamang.
