Gihupay sa palasyo ang nagsamot nga kalabalak sa publiko batok sa posibilidad nga musangpot sa World War 3 ang kasamtangang tensiyon sa Middle East, ilabi na ang panagbangi tali sa Iran ug Israel.
Namahayag si Palace Press Officer Claire Castro nga mipakanaug na sa direktiba si Presidente Ferdinand Marcos Jr., aron ipa-aktibo ang tanan ahensya sa gobyerno ilabe ang mga embahada ug kunsulada sa mga silingangang kanasuran sa Tunga-Tungang Sidlakan, ilabe na sa mga Pilipino nga gustong mubiya sa gubot nga nasud.
Miingon si Castro nga plastada na ang contingency plans gikan sa Department of Foreign Affairs (DFA), Department of Migrant Workers (DMW), ug ang Armed Forces of the Philippines (AFP), aron masiguro ang kaluwasan sa mga Pilipino sa abroad, labi na sa mga nasud nga apektado sa tensiyon.
Gawas pa niini, mingon si Castro nga ang Presidente nanawagan sa kalinaw ug diplomasya, ug nag-awhag sa tanang nasud nga likayan ang dugang nga panagbangi.
Gisuportahan usab sa Pilipinas ang panawagan sa United Nations alang sa kalinaw ug paglikay sa sunod-sunod nga panimalos nga makadaot sa rehiyon ug sa kalibutan.
Sa laktod, miingon ang Palasyo nga wala’y rason aron magpanik ang katawhan kay ang gobyerno naglihok ug nag-andam aron protektahan ang interes ug kaluwasan sa tanang Pilipino, sa sulod ug sa gawas sa nasud.
