CAGAYAN DE ORO CITY- Pormal na nga gilusad sa Cagayan de Oro City Police Office o COCPO ang Kabataan Kontra Droga at Terrorismo sa syudad kagahapong adlawa.
Gibutyag ni COCPO Deputy Chief PCR Police Maj Rey Taboclaon nga tumong sa programa nga malikay ang kabatan-onan ug malayo sa mga dautang binuhatan sama sa pagpayuhot sa droga ug pag alsa batok gobyerno.
Miingon si Taboclaon nga ni-minus na ang mga nalambigit sa droga sa syudad tungod sa agresibo nga kampanya sa gobyerno apan giangkon usab niini nga may 12-anyos nga nalambigit sa droga sa dakbayan.
Samtang nagtoo ang Task Force Oro nga dako’g ikatabang aron mabatukan ang terorismo sa programag “Kabataan Kontra Droga o KKDAT ning syudad. Miingon si Task Force Oro commander Army Maj Ashley Pumbaya nga mahinungdanon ang pag-edukar sa mga batan-on aron mabatukan ang terorismo.
Dugang niini nga mao kini ang ilang programa aron maatbangan ang paspas nga recruitment nga gihimo sa mga rebeldeng New Peoples Army o NPA ug ubang teroristang pundok.
Gani, gibutyag ni Pumbaya nga tungod sa ilang gihimo, gaduha-duha na ang mga walhong grupo nga mohimo’g recruitment sa mga batan-on nga nagtungha sa mga unibersidad sa syudad.
