Misupak ang Kabataan Party-list sa pagtan-aw sa gobyerno nga “grooming ground” ang pag-apil sa aktibismo sa mga kabatan-onan.
Sumala ni Cobbie Jan Canda, chairperson sa Kabataan Party-list Southern Mindanao Region, daghang batan-on ang boluntaryong nagpakig-uban sa mga komunidad, mamumuo ug mag-uuma tungod kay nakita nila ang tinuod nga kahimtang ug panginahanglan sa katilingban.
Dugang pa niya, ilabina sa mga estudyante sa state universities, kabahin sa ilang katungdanan ang pag-adto sa mga komunidad aron mas masabtan ang kahimtang sa katawhan ug matuman ang pagserbisyo sa publiko.
Giingon usab niya nga daghang benepisyo ang natagamtam karon sa kabatan-onan resulta sa nangaging mga paningkamot ug pakigbisog sa mga aktibista.
Busa, alang kang Canda, dili angay hulgaon ang kabatan-onan nga gustong moapil sa mga lehitimong panawagan, kondili suportahan ang ilang aktibong partisipasyon sa pagtubag sa mga suliran sa nasod.
Dugang pa niya, sayop ang estorya nga “grooming ground” ang aktibismo.
Mas angay, matod pa niya, nga pangutan-on kung nganong gipili sa mga kabataan nga mutindog ug mutingog alang sa mga sektor nga nagkinahanglan sa ilang tingog karong panahona.
