Nanawagan ang grupong Kabataan Party-list nga patas-an ang suhol sa mga mamumuo isip sentrong panawagan sa umaabot nga Mayo Uno.
Sa pakighinabi sa Bombo Radyo, si Cobbie Jan Canda, chairperson sa Kabataan Party-list Southern Mindanao Region, miingon nga ubos ra gihapon ang minimum wage sa pipila ka rehiyon sama sa Davao ug Zamboanga, diin dili igo ang kasamtangang kantidad aron matabonan ang adlaw-adlaw nga panginahanglan sa usa ka pamilyang adunay lima ka miyembro.
Dugang pa niya, sumala sa economic statistics, mokabat sa kapin ₱1,200 ang gikinahanglan kada adlaw alang sa pagkaon, abang sa balay, bayad sa kuryente, tubig ug pag-eskwela sa mga anak.
Giingon usab niya nga padayon ang pagsaka sa presyo sa lana ug nagkalain-laing palaliton, nga mas nagpabug-at sa kahimtang sa mga trabahante ug ordinaryong katawhan.
Gawas sa taas nga suhol, gipasiugda usab ni Canda ang panginahanglan sa pagpalambo sa nasudnong industriya aron mamugna ang daghang trabaho ug mamenosan ang pagsalig sa imported nga mga produkto sa nasod.
