Gihagit karon sa pundok sa Kabataan Partylist ang nagpadayong naratibo nga ang tanang Dabaweño supak sa impeachment ni Bise Presidente Sara Duterte.
Sumala pa ni Cobbie Jan Canda, kinahanglan nang bungkagon kini nga pagtuo tungod kay tataw dunay mga lumulupyo sa dakbayan nga dugay na nga biktima sa dili maayo nga serbisyo publiko bisan pa sa upat ka dekada nga pagpangatungdanan sa mga Duterte.
Dugang pa ni Canda, makita ang kakuwang sa pagtagad sa mga batakang panginahanglan sama sa mga eskwelahan ug ang padayon nga problema sa baha sa Davao City.
Tungod niini, gipamugos sa maong pundok nga dili lang si Bise Presidente Duterte ang angay manubag sa mga alegasyon sa korapsyon, apan apil na usab ang administrasyon ni Presidente Marcos Jr.
