Nanawagan ang Kabataan Partylist nga mapaspasan ang proseso sa impeachment trial batok kang Bise Presidente Sara Duterte aron mahibaloan sa publiko ang tinud-anay nga padulngan sa pundo sa nasod.
Gipahayag ni Cobbie Jan Canda sa Kabataan Partylist nga ang gihimo karon sa kampo sa bise presidente atol sa pre-trial conference puro lamang mga teknikalidad ug walay igong depensa batok sa mga alegasyon nga nag-atubang kaniya.
Dugang pa ni Canda, angay gayod nga maduso ang maong proseso sanglit kwarta kini sa katawhan nga gikan sa mga buhis nga gibayad sa matag transaksyon ug serbisyo.
Sa laing bahin, gihatagan og gibug-aton sa grupo nga katungod sa mga Pilipino ang mahibalo kon giunsa paggasto ang ilang mga kontribusyon.
Busa, gipamugos sa grupo nga kinahanglan mahatagan og katin-awan ang mga isyu nga nalambigit sa bise presidente aron matubag ang mga pangutana sa katilingban.
