Giklaro ni Cobbie Jan Canda, chairperson sa Kabataan Partylist Southern Mindanao, nga dili igo ang pagpangayo og pasaylo sa mga awtoridad mahitungod sa kontrobersyal nga listahan sa mga aktibista nga gipagawas sa PNP Cateel, Davao Region.
Hinuon, nagpadayon ang ilang panawagan nga kinahanglan adunay manubag sa maong insidente tungod kay kini usa ka tin-aw nga paglapas sa ilang tawhanong katungod.
Subay sa pamahayag ni Canda, ang pag-post sa ilang mga dagway ug impormasyon naghatag kanila og hulga ug naghimo kanila nga daling puntirya sa red-tagging, vilification, ug uban pang matang sa harassment sa umaabot.
Siya miingong usa kini ka malapdon nga mekanismo nga gitumong sa mga aktibista, hinungdan nga nagplano ang ilang grupo nga mopasaka og kaso sa Commission on Human Rights ug makig-alayon sa ilang legal team alang sa uban pang tukmang lakang.
Hisayran nga ang maong hitabo nagbilin og dakong trauma ug kabalaka dili lang sa mga biktima apan lakip na sa ilang tagsa-tagsa ka mga pamilya.
