Gipanawagan ni Asmana Umpat, Prime Minister sa Supreme Student Government sa Mindanao State University, ang tanang batan-ong Bangsamoro nga mubarog ug magmata batok sa nagakahitabong dibisyon sa rehiyon.
Matod ni Umpat, dako og kaakohan ang kabatan-onan nga dili magpalupig ug dili basta-basta magpadala sa mga politikal nga maniobra nga nagdala lamang og kasamok ug naguba sa ilang kaugmaon.
Iyang gipasabot nga angay gamiton sa kabatan-onan ang ilang tingog ug kusog aron ipatigbabaw ang kamatuoran ug ang tiunay nga interes sa katawhan.
Siya miingon nga pinaagi sa panag-uban sa mga batan-ong lider, mas mapanalipdan ang kalinaw nga dugay nang gipakigbisogan sa ilang mga katigulangan sulod sa Bangsamoro.
Para kaniya, ang hiniusang baroganan sa bag-ong henerasyon mahimong lig-on nga pondasyon aron mapatunhay ang hustisya ug mapugngan ang dautang tinguha sa mga mapahimuslanong politiko sa BARMM.
