Milusad og rally ang Kalipunan ng Damayang Mahihirap (KADAMAY) sa atubangan sa Department of Social Welfare and Development (DSWD) sa kaulohan aron ipadayag ang ilang panawagan alang sa mas lig-on nga social protection programs ug substansyal nga ayuda para sa mga marginalized sectors sa nasud.
Namahayag si KADAMAY Secretary General Mimi Doringo sa Bombo Radyo nga bisan pa og giangkon sa DSWD nga nakapaminaw sila sa ilang mga reklamo, nagpabilin gihapon ang ilang kabalaka tungod kay ang implementasyon sa mga programa daw nakahikot sa mga polisiya ug limitasyon nga nakaapekto sa aktuwal nga pag-abot sa ayuda.
Dugang pa niya, adunay mga kaso nga bisan pa og naapil na sa listahan ang mga benepisyaryo sama sa mga tricycle ug jeepney drivers, daghan gihapon ang wala makadawat tungod sa technicalities sa sistema.
Gipunto usab niya nga kasagarang assistance nga ilang nadawat limitado lamang sa medical ug burial aid, nga dili angay sa tinuod nga panginahanglan sa mga pamilya nga naglisod sa adlaw-adlaw nga panginabuhi.
Tungod niini, padayon ang KADAMAY sa ilang panawagan nga repasohon ang sistema sa ayuda aron masiguro nga ang social protection programs mas responsive ug tinuod nga makatubag sa kahimtang sa mga kabus sa panahon sa krisis.
